Patronat de Turisme de la Diputació de Lleida a metut en marcha ua naua campanha de promocion toristica aguesta primauera, centrada especiaument ena floracion, es activitats ena natura, eth rafting e eth patrimòni culturau. Damb un investiment de 255.000 euros apuprètz, era accion promocionau s’estructure en dues fases: ua prumèra dedicada ara floracion, desvolopada pendent març, e ua dusau orientada ath torisme actiu e culturau, que s’esperlongarà enquiath junh.
En tot coïncidir damb era commemoracion des 40 ans des prumères baishades de rafting en arriu Noguèra Palharesa, era campanha darà protagonisme ad aguesta activitat emblematica entà consolidar Lhèida coma territòri pionèr e referent en espòrts d’aventura. Ath delà, era iniciativa cèrque de refortir era imatge deth Pirenèu e es Tèrres de Lhèida coma ua destinacion ideau entà escapades de primauera, e destaque era sua aufèrta de natura, cultura, gastronomia e prepauses d’òci pensades entà toti es publics.
Era campanha se presente jos er eslogan “Lhèida, tot çò que cèrques ei en interior”, un messatge que met en valor era esséncia dera destinacion a trauès des concèptes ADN: Autentica, Diferenta e Naturau. Es principaus mercats as quaus s’adrece son eth catalan, er estatau e eth francés, damb ua atencion especiau ath sud de França.
Mès informacion:
