Eth passat dijaus, 7 de mai, eth vicepresident de Patronat de Turisme de la Diputació de Lleida, Juan Antonio Serrano, e eth director der organisme, Juli Alegre, recuelheren eth prèmi des lectors dera revista Viajes National Geographic, qu'an reconeishut eth Pirenèu de Lhèida coma era melhora destinacion naturau der Estat.
En acte de liurament de prèmis, celebrat en auditòri d’RBA en Barcelona, damb era preséncia deth ministre d’Indústria e Torisme, Jordi Hereu, Serrano assegurèc qu'aguest guerdon a ua valor fòrça especiau pr'amor que nèish dera experiéncia reau des visitaires, deth sòn guardar e dera sua estima peth Pirenèu de Lhèida.
Eth vicepresident metec en valor era grana riquesa naturau deth Pirenèu de Lhèida, en tot destacar qu'eth territòri dispause d’ua aufèrta toristica de prumèr nivèu gràcies a espacis tan representatius coma eth Parc Nacionau d’Aigüestòrtes e Estanh de Sant Maurici, es parcs naturaus deth Parc Naturau deth Naut Pirenèu e deth Parc Naturau deth Cadí-Moixeró, e tanben deth Geoparc Orígens. Tanben remerquèc er atrèt d’autes experiéncies vinculades ath torisme de natura, coma era observacion d’audèths, es banhs de bòsc o es activitats restacades damb era astronomia. En aguest sens, rebrembèc qu'eth territòri compde damb dues destinacions e resèrves Starlight: eth Parc Nacionau e eth Montsec.
Deth sòn costat, eth director deth Patronat exprimic era satisfaccion per recéber aguest guerdon, que considère ua reconeishença ath prètzhèt contunhat entà consolidar eth Pirenèu de Lhèida coma ua destinacion destacada en torisme de natura, sostenible e de qualitat. Egaument, soslinhèc qu'aguest posicionament ei frut deth trabalh conjunt deth sector toristic deth territòri, damb un modèl orientat a promòir es valors naturaus, culturaus e gastronomics deth Pirenèu en tot preservar eth païsatge e es tradicions locaus.
Mès informacion:
