Eth Govèrn a acordat declarar eth MORERA, Musèu d’Art Modèrn e Contemporanèu de Lhèida, coma musèu d’interès nacionau, compde tengut qu'a ua trajectòria centenària, un hons patrimoniau unic, e ua significacion especiau entath patrimòni culturau de Catalonha. Egaument, exercís un ròtle essenciau en estudi, era preservacion, era recèrca e era difusion der art modèrn e contemporanèu de Catalonha e deth Cogant catalan.
Damb aguesta distincion, eth Morera ei eth dusau equipament culturau enes comarques deth Cogant Catalan en obtier aguesta reconeishença dempús qu'eth 2016 la recebesse eth Musèu de Lhèida, Diocesan e Comarcau. Actuaument, en Catalonha, i a ua quinzea d’equipaments museaus que possedissen aguesta distincion d’interès nacionau.
Eth Govèrn s’a basat ena trajectòria centenària deth Morera (inaugurat eth 1917 dera man deth pintor Jaume Morera i Galícia) e en hèt que consèrve era colleccion publica d’art modèrn e contemporanèu mès importanta de Catalonha, damb ath torn de 6.000 òbres registrades, qu'includissen pintura, escultura, diboish, arts grafiques, benda dessenada, fotografia, installacions e naui lenguatges artistics visuaus.
Dempús deth sòn nau plaçament er an 2024 ena anciana Audiéncia Provinciau en rambla Ferran, eth Morera a recebut mès de 50.000 visitaires e lèu 80.000 usatgèrs.
Mès informacion:
