Sies enterpreses toristiques de Palhars Sobeiran s’an incorporat recentament ara Carta Europèa de Torisme Sostenible (CETS) de Naut Pirenèu, un distintiu impulsat pera Federacion EUROPARC que reconeish es iniciatives comprometudes damb era preservacion deth miei ambient e era gestion responsabla deth territòri.
Er acte de liurament des naues acreditacions se celebrèc eth passat 13 de mai enes installacions de MónNatura Pirineus, en Son. Aguesta certificacion, presenta en nauanta espacis protegidi europèus apuprètz, avale enterpreses e equipaments qu’adòpten critèris de sostenibilitat ambientau, sociau e territoriau ena sua activitat.
Eth Parc Naturau de Naut Pirenèu obtenguec era CETS er an 2023, hèt que permetec iniciar eth procès d’adesion d’enterpreses e equipaments deth territòri. Entà hèr-ne partida, es entitats deuen demostrar eth sòn compromés damb era conservacion der entorn, ampliar era coneishença sus eth Parc Naturau e definir un plan d’accions sostenibles entàs tres ans venents.
Damb aguestes naues incorporacions, ja son 22 es enterpreses toristiques e 6 es equipaments de Palhars Sobeiran e Naut Urgelh que compden damb aguesta acreditacion europèa. Ath delà dera reconeishença, es entitats aderides accedissen a assessorament especializat, espacis de cooperacion damb d’autes destinacions sostenibles e ua major projeccion laguens des canaus de promocion toristica.
Parallèlament, Patronat de Turisme de la Diputació de Lleida contunhe d’impulsar era sostenibilitat toristica a trauès deth projècte Biosphere. Er ensem deth Pirenèu e es Tèrres de Lhèida dispause dera distincion Biosphere Gold Destination, deth temps que mès de 260 enterpreses e entitats dera demarcacion an iniciat eth procès de certificacion. Actuaument, 46 ja n'an obtengut eth distintiu e 162 mès desvolòpen plans especifics de sostenibilitat.
Aguest compromés deth sector se tradusís tanben en resultats tangibles, damb mès de 3.000 accions e 5.500 activitats restacades damb era sostenibilitat e es Objectius de Desvolopament Sostenible (ODS), en tot consolidar era destinacion coma un referent en torisme responsable e regeneratiu.
Mès informacion:
www.aralleida.cat
https://redeuroparc.org/carta-europea-turismo-sostenible/
Era revolucion deth torisme sostenible en Lhèida | Biosphere Sustainable
