Era Val d’Aran a acuelhut eth passat mes de mai er AdventureELEVATE Europe, ua des principaus amassades internacionaus deth sector deth torisme actiu e de natura, qu’a amassat apròp de 300 professionaus de pertot deth mon entre viatgistes, agéncies especializades, mejans de comunicacion e expèrts deth sector.
Er eveniment, impulsat per Adventure Travel Trade Association (ATTA) damb era collaboracion dera Agéncia Catalana de Torisme, Patronat de Turisme de la Diputació de Lleida e eth Conselh Generau d’Aran, a estat ua oportunitat estrategica entà refortir era projeccion internacionau deth Pirenèu e de Catalonha coma destinacions de referéncia en torisme sostenible, actiu e de natura.
Pendent eth congrès, es enterpreses catalanes especializades en activitats de montanha e experiéncies ena natura an pogut presentar era sua aufèrta deuant des principaus viatgistes e prescriptors internacionaus deth sector.
Eth vicepresident de Patronat de Turisme, Juan Antonio Serrano, a destacat qu’era celebracion d’aguest congrès en territòri confirme eth potenciau deth Pirenèu coma destinacion de prumèr nivèu e permet mostrar ath mon era qualitat dera aufèrta toristica e eth compromés damb era sostenibilitat.
En quadre der AdventureELEVATE Europe, 43 viatgistes e jornalistes internacionaus an participat en cinc viatges de familiarizacion e premsa entà conéisher era aufèrta toristica deth Pirenèu e es Tèrres de Lhèida. Eth congrès a estat decisiu entà refortir eth posicionament internacionau dera destinacion, promòir era dessasonalizacion e generar naues oportunitats entàs enterpreses catalanes.
Mès informacion:
https://aralleida.cat/newnotes/adventureelevate-europe-2026-val-aran-lleida/
https://events.adventuretravel.biz/adventureelevate/europe-2026
