Era estacion de Boí Taüll a presentat ua des granes nauetats dera campanha d’ostiu: era metuda en marcha dera tirolina dobla de mès d’un quilomètre, que permeterà as visitaires experimentar un desnivèu de 102 mètres en tot partir de mès de 2.000 mètres de nautor.

Era naua infrastructura toristica aufrís un vòl panoramic e vertiginós, a compdar dera zòna deth Plan de Vaques, enquiath parcatge de veïculs dera corba dera carretèra L-501, en tot subervolar era val deth Riuet de Molleres damb era panoramica frontau dera val e ena quau se pòden lançar dues persones simultanèament. Aguesta tirolina se somarà ara que se dauric est’an passat ena basa deth complèxe, damb ua distància de 200 mètres.

Egaument, uera tirolina de long recorrut connècte dempús d’aguesta primauera es dues arribes dera restanca de Rialb, plaçades enes municipis de La Baronia de Rialb e Tiurana. Eth punt de gessuda ei plaçat en nuclèu de Vilaplana, en La Baronia de Rialb, a ua altitud d’uns 550 mètres sus eth nivèu dera mar, deth temps qu’era estacion d’arribada se trape en Tiurana, a uns 450 mètres d’altitud. A un quilomètre de recorrut, apuprètz, e uns 100 mètres de desnivèu, que passen 30 mètres per dessús dera restanca de Rialb. Eth còst totau dera accion a estat de lèu 200.000 €, des quaus era Diputació de Lleida n’a subvencionat eth 95 %, mercés as subvencions dera Linha 3 de Desfís Demografic, destinades ath finançament de projèctes e accions que permeten crear naues opcions d’ocupacion e desvolopament.

Es dues accions, en Nauta Ribagòrça e en Noguera, an per tòca contribuïr ara dinamizacion toristica e economica dera zòna e èster referentes deth torisme actiu e d’aventura en Catalonha.

Mès informacion:

https://www.turismefgc.cat/es/destinos/esqui-muntanya/boi-taull/
www.titurana.cat
www.baroniaderialb.cat