Er Ajuntament d’El Pont de Suert a installat quate naui panèus informatius laguens deth projècte “Caractèr legendari. Identitats mitiques dera literatura orau en El Pont de Suert”, ua iniciativa que vò méter en valor quauqui uns des principaus espacis de legenda deth municipi e apropar-les a visitaires e residents.
Eth projècte combine patrimòni naturau, istòria e tradicion orau entà aufrir ua naua interpretacion deth païsatge a trauès des legendes populares. En aguesta prumèra fasa s’an senhalizat quate endrets emblematics: eth Tossal de Suert (legenda de “La Padrina de Suert”), eth monastèri de Lavaix e eth Cap del Frare (“El Manobre Murri” e “El Frare Avariciós”), Erillcastell (“Roger d’Erill, el Baró de la Fama”) e eth dolmèn de Pinyana (“La Geganta de la Cadolla”).
Es panèus includissen illustracions inspirades enes mites, un resumit de cada legenda, informacion istorica e geografica des espacis e ua rota a pè accessibla mejançant era plataforma Wikiloc. Coma element singular, es personatges representadi enes imatges son vesins e vesies deth municipi.
Era accion a estat finançada per Ajuntament damb eth supòrt dera Institucion des Letres Catalanes deth Departament de Cultura dera Generalitat. Deuant dera bona acuelhuda dera iniciativa, eth consistòri preve desvolopar ua dusau fasa er an 2027. Eth projècte, que se desvolòpe e finance mejançant un projècte europèu Leader, hè partida deth plan globau de senhalizacion e interpretacion deth patrimòni locau, que tanben incorporarà d’aciu pas guaire naui elements restacadi as Mines de Malpàs.
Mès informacion:
