Er Ajuntament de Tremp s’a aderit ath projècte Viles Florides de Catalonha, un projècte que vò méter en valor es espacis verdi des municipis e promòir ua manèra de hèr mès sostenibla e respectuosa damb eth miei ambient. Eth consistòri palharés tanben jògue era carta de potenciar es parcs e jardins coma espacis d’amassada, de léser e de qualitat de vida entas ciutadans.

Era iniciativa Viles Florides, impulsada pera Confederacion de Orticultura Ornamentau de Catalonha (CHOC) damb eth supòrt dera Agéncia Catalana de Torisme, reconeish es municipis que trabalhen entà auer espacis verdi plan suenhadi, damb flors, arbes e zònes enjardinades, tant en espacis publics com privats. Er objectiu ei auançar de cap a pòbles e ciutats mès agradius e sostenibles.

Er Ajuntament de Tremp a indicat qu’aguesta participacion represente ua reconeishença ath trabalh que ja s’amie a tèrme entà suenhar e potenciar eth verd urban, e tanben ua oportunitat entà contunhar en tot auançar en aguesta linha. En aguest sens, eth consistòri ja a impulsat accions entà melhorar er estauviament d’aigua, coma era modificacion des sistèmes d’adaiguatge per gotejamanet e era plantacion d’espècies vegetaus e flors damb besonhs idrics mès redusidi.

Era iniciativa Viles Florides s’a consolidat enes darrèri ans coma un distintiu de qualitat ambientau e païsatgistica pertot de Catalonha, damb era tòca de promòir municipis mès verdi e comprometudi damb eth benèster des persones.

Mès informacion:
https://vilesflorides.cat/tremp/