Patronat de Turisme de la Diputació de Lleida participe enes jornades Spain Travel Market Europe 2026, que se celèbren en Pampalona deth 14 ath 18 de seteme. Organizades per Turespaña, es sessions an per objectiu promòir er Slow Travel, eth torisme de natura, es destinacions ruraus, es rotes culturaus, era gastronomia e es experiéncies premium.
Mejançant ua vintea de reünions individualizades damb viatgistes e agéncies europèes, eth Patronat vò daurir naues oportunitats de negòci en mercats europèus, en tot jogar era carta deth torisme sostenible e dera singularitat dera gastronomia lheidatana e es activitats culturaus e de torisme actiu.
Dempús des jornades, un detzenat de viatgistes europèus, procedenti de mercats deth nòrd e deth centre d’Euròpa, amiaràn a tèrme un viatge de familiarizacion pera demarcacion de Lhèida entà pr’amor de conéisher de prumèra man eth Parc Nacionau d'Aigüestòrtes e Estanh de Sant Maurici, es pòbles damb encant de Val d’Aran e era aufèrta de hormatges de Naut Urgelh.
Er objectiu de Turespaña enes jornades Spain Travel Market Europe 2026 ei facilitar eth contacte dirècte entre uns 75 viatgistes e agéncies europèes de referéncia e apròp de 70 enterpreses e entitats de promocion toristica de diferentes destinacions espanhòles.
Era iniciativa cerque d’atrèir un visitaire de naut poder adquisitiu, incrementar es ingrèssi derivadi dera activitat toristica e, especiaument, contribuïr a dessasonalizar e desconcentrar es fluxi de visitaires. En aguest quadre, es crompadors internacionaus poderàn conéisher de prumèra man era aufèrta des diferentes destinacions e incorporar enes sòns catalògs naues prepauses toristiques, damb especiau atencion ad aqueres basades en critèris de sostenibilitat.
Mès informacion:
