Es Hestivaus de Senderisme des Pirenèus (FSP) centraràn enguan era sua programacion ena sostenibilitat e aufriràn activitats pensades entà hèr a préner consciéncia sus es efèctes deth cambiament climatic enes entorns de montanha. Ath delà des prepauses vinculades ath miei ambient, eth projècte contunharà de jogar era carta deth sòn format abituau, damb gessudes guidades en grops redusidi, activitats culturaus e experiéncies gastronomiques.
Era 11au edicion dera iniciativa se celebrarà entre es mesi de mai e octobre damb un totau de dètz eveniments distribuïdi en ueit comarques dera marca Pirenèus. Sèt d’aguesti hestivaus se debanaràn en Pirenèu de Lhèida: Eth Hestivau de Senderisme de La Conca Dellà, en Palhars Jusan, deth 15 ath 17 de mai, serà er encargat d’inaugurar eth calendari; lo seguiràn eth Camin_art d’El Pont de Suert, en Nauta Ribagòrça, deth 22 ath 24 de mai; eth Cerdanha Happy Walking, eth 5 e 6 de junh; eth Festival Camina Pirineus Alt Urgell, deth 12 ath 14 de junh; eth Festival de Senderisme Vall Fosca-Pirineus, en Palhars Jusan, deth 9 ath 12 de junhsèga; eth Vall de Boí Trek Festival, en Nauta Ribagòrça, deth 10 ath 12 d’octobre, e eth Senderi-Festival de Senderisme de Sort, en Palhars Sobeiran, deth 16 ath 18 d’octobre, que meterà eth punt finau ad aguesta edicion.
Es FSP an per tòca impulsar un modèl de torisme propèr, salutós e sostenible, respectuós damb er entorn naturau e damb era populacion locau, especiaument dehòra des epòques de mès grana afluéncia toristica coma era sason d’esquí e eth mes d’agost. Es activitats de senderisme se desvolòpen en grops redusidi, sòlen èster accessibles entà toti es publics e compden damb guides interpretadors deth territòri. Es hestivaus, damb ua durada d’entre dus e quate dies, tanben incorpòren prepauses gastronomiques, culturaus e activitats restacades damb era astronomia.
Er Institut entath Desvolopament e era Promocion deth Naut Pirenèu e Aran (IDAPA), a trauès dera Taula de Camins deth Naut Pirenèu e Aran, ei er organisme encargat de coordinar es hestivaus; compde damb eth supòrt dera Marca Toristica Pirenèus, Patronat de Turisme Costa Brava Girona e Patronat de Turisme Ara Lleida.
Mès informacion:
