Era cultura e era gastronomia deth Pirenèu e es Tèrres de Lhèida sigueren presentes eth passat 5 de mai ena presentacion der An deth Torisme Culturau celebrada en Palai des Arts de Valéncia, en ua accion promocionau organizada pera Agéncia Catalana de Torisme damb era collaboracion des patronats de torisme des deputacions de Lhèida e Girona.
Er acte servic tà mostrar era diuersitat culturau e gastronomica dera destinacion deuant d’un centenat de professionaus deth sector toristic, jornalistes, creadors de contengut e representants institucionaus. Era prepausa gastronomica compdèc damb era participacion deth saumalièr lheidatan Gregori Albareda, reconeishut eth 2025 damb era posicion 23 deth classament Top 100 Sommeliers España, elaborat per Sommelier Edit.
Pendent era presentacion, eth director de Patronat de Turisme de la Diputació de Lleida, Juli Alegre, destaquèc era singularitat culturau deth territòri, damb un recorrut qu’amasse a compdar des hèstes tradicionaus, es musèus e es camins de peregrinacion enquia un patromòni reconeishut pera UNESCO, en tot hèr referéncia a elements coma er art rupèstre, eth romanic, es halhes, es carrassèrs, era pèira seca o eth toc manuau de campanes.
Alegre tanben metec en valor eth ligam entre territòri e gastronomia, en tot assegurar qu’era esséncia dera nòsta cultura a eth sòn rebat tanben enes productes gastronomics. En aguest sens, es vins dera DO Costers del Segre e es òlis des Tèrres de Lhèida sigueren protagonistes deth sopar degustacion celebrat dempús der acte, a cargue deth cap de codina Àlex Carrera e deth madeish Gregori Albareda.
Fin finau, eth director deth Patronat remerquèc eth compromés deth Pirenèu e es Tèrres de Lhèida damb un modèl toristic sostenible e regeneratiu, endralhat de cap a un visitaire conscient e respectuós damb eth territòri.
Mès informacion:
https://aralleida.cat/newnotes/la-cultura-i-la-gastronomia-de-lleida-protagonistes-a-la-presentacio-de-lany-del-turisme-cultural-a-valencia/
