Era Val d’Aran acuelhec es passats 21 e 22 de mai ua naua edicion dera Jornada InterPirenèus, qu’amassèc apròp d’un centenat de representants d’enterpreses e entitats toristiques des comarques pirenenques. Era amassada includic diuèrses presentacions, un workshop entath sector privat, un talhèr entath sector public, espacis de networking e reunions professionaus damb er objectiu de promòir era collaboracion e era competitivitat deth sector.
Eth vicepresident de Patronat de Turisme de la Diputació de Lleida, Juan Antonio Serrano, destaquèc qu’era celebracion consecutiva dera InterPirenèus e deth congrès AdventureELEVATE Europe contribuïssen a consolidar eth Pirenèu coma ua destinacion de referéncia en torisme actiu e de natura. Tanben remerquèc era importància d’aguesti espacis entà crear aliances, compartir experiéncies e auançar de cap a un modèl toristic mès sostenible e innovador.
Era jornada arringuèc dijaus damb un sopar de benvenguda que coïncidic damb era clausura der AdventureELEVATE Europe, en tot favorir eth contacte entre enterpreses locaus, viatgistes e jornalistes internacionaus. Ath delà, s’organizèren dus viatges de familiarizacion damb ueit viatgistes que visitèren diferentes comarques deth Pirenèu.
Era InterPirenèus ei organizada peth programa Pirenèus de Catalonha, integrat pera Agéncia Catalana de Torisme (Departament d’Enterpresa e Trabalh), Patronat de Turisme de la Diputació de Lleida, er Institut entath Desvolopament e era Promocion deth Naut Pirenèu e Aran – IDAPA (Departament de Territòri, Abitatge e Transicion Ecologica), Ferrocarrils de la Generalitat de Catalunya, es Patronats de Torisme de Còsta Brava Girona e dera Deputacion de Barcelona e eth Conselh Generau d’Aran.
Mès informacion:
https://aralleida.cat/newnotes/interpirineus-val-daran/
https://visitpirineus.com/ca/professionals/descarregues/1310
