Era Rota Cisterciana a impulsat ua naua seria audiovisuau formada per sies vidèos e sies reels entà promòir eth GR 175, un itinerari circular que trauèsse es comarques de Naut Camp, Conca de Barberà e Urgelh. Era iniciativa mòstre diferentes manères de hèr aguest camin, tant a pè coma en bicicleta o e-bike de montanha, en coble, damb amics, en solitari o damb animaus de companhia.
Es pèces audiovisuaus recreen experiéncies reaus de viatge e meten en valor es païsatges, es pòbles, es monastèris cistercians e eth patrimòni culturau deth territòri. Tanben destaquen servicis complementaris coma eth transpòrt d’equipatges, es burèus de torisme, eh Carnet 6T e eth consum de productes locaus.
Eth projècte compde damb era participacion de lotjaments aderidi ath programa Carnet 6T, en tot refortir ua aufèrta toristica coordinada e de qualitat. Un des objectius principaus ei promòir era mobilitat sostenibla, especiaument a trauès dera bicicleta electrica de montanha.
Es contenguts s’adrecen a persones interessades ena natura, era cultura, eth senderisme e eth ciclotorisme, damb era volontat de plaçar eth GR 175 coma ua experiéncia adaptabla a diferenti ritmes e motivacions. Era iniciativa reafirme eth compromés des conselhs comarcaus implicadi damb un modèl toristic sostenible e a estat finançada damb fons europèus NextGeneration EU, damb un investiment de 9.525 euros.
Avaloracion toristica 2025
D’un aute costat er airau de Torisme d’Urgelh a presentat es donades toristiques deth 2025. Destaque er important aument de visites as activitats organizades damb motiu dera floracion enes que participèren 2.925 persones –er an 2024 sigueren 1.750–.
Es burèus de torisme d’Urgelh atengueren 17.735 persones e es espacis més visitadi dera comarca sigueren eth Monastèri de Santa Maria de Vallbona de les Monges, damb 16.604 persones, er espaci Mas de Colom - Casa Borges de Tàrrega, damb 14.198 e eth Musèu deth Torrom e eth Chicolate d’Agramunt damb 12.800 persones. Eth totau, 80.505 persones visitèren aguesti equipaments culturaus.
Per çò qu’ei des visites guidades, es espacis d’Agramunt, Bellpuig, Guimerà, Tàrrega, Verdú e Vilagrassa acuelheren 5.786 persones. Fin finau, era aucupacion mejana des lotjaments d’Urgelh pendent eth 2025 siguec deth 42,54 %, damb un aument deth 5 % en relacion ar an 2024.
Mès informacion:
https://gr175.larutadelcister.cat/
https://www.youtube.com/@LaRutaDelCister89/videos
www.urgell.cat
