Eth Parc Nacionau d’Aigüestòrtes e Estanh de Sant Maurici, es parcs naturaus deth Naut Pirenèu e deth Cadí-Moixeró e eth Geoparc Orígens dispausaràn de 84 ecocompdaders que permeteràn conéisher damb fòrça mès exactitud eth nombre de visitaires que receben. D’aguesti dispositius, 66 compdaràn persones, e es auti 18, plaçadi enes vies d’accès e es parcatges des parcs, comptabilizaràn veïculs.
Era informacion proporcionada pes aparelhs permeterà ua melhora gestion des airaus protegidi e aplicar mesures de conservacion mès eficientes, coma incrementar era susvelhança ambientau quan serà de besonh o limitar es accèssi en moments d’excessiva afluéncia, en tot hèr possible un torisme mès respectuós damb eth miei, qu'age un menor impacte enes ecosistèmes.
Era mesura a supausat un investiment de 270.000 euros e hè partida deth projècte Naturalment Lleida finançat damb 3,5 milions d’euros des fons Next Generation dera Union Europèa. Set des ecocompdaders se plaçaràn en recorrut dera Rota des Lacs, era Rota deth Sió e es vies blues deth Segre e deth Cardener, egaument finançades damb fons europèus.
Eth projècte Naturalment Lleida s’enquadre en modèl de torisme sostenible e regeneratiu que se mèrque coma objectiu eth Plan Estrategic de Torisme deth Pirenèu e es Tèrres de Lhèida, e preten potenciar eth ròtle des espacis naturaus dera demarcacion coma motor de desvolopament locau en tot favorir ar encòp ara sua preservacion.
Ena madeisha linha de hèr mès sostenible eth torisme enes espacis naturaus dera demarcacion, d’acòrd damb çò establit en Plan Estrategic, eth Patronat presentèc aguest passat mes d’abriu ath sector toristic de Nauta Ribagòrça eth projècte Biosphere, en ua jornada qu'auec coma scenari er Outdoor Park dera Val de Boí.
Eth Pirenèu e es Tèrres de Lhèida an recebut era distincion Biosphere Gold Destination e a compdar deth Patronat s’aufrís as organismes publics e enterpreses privades deth sector era possibilitat de generar es sòns pròpris plans de sostenibilitat entà arténher era certificacion Biosphere. Enquia ara, mès de 260 enterpreses e entitats deth territòri an iniciat eth procès d’adesion, des quaus 162 son comprometudes damb un plan de sostenibilitat e 45 ja an obtengut era certificacion.
Ath delà, eth sector toristic lheidatan a amiat a tèrme enquia ara mès de 3.000 accions e 5.000 activitats restacades damb era sostenibilitat e damb es Objectius de Desvolopament Sostenible (ODS) dera ONU. Deth sòn costat, es parcs naturaus de Naut Pirenèu e deth Cadí-Moixeró an artenhut era reconeishença dera Carta Europèa de Torisme Sostenible (CETS) a on es enterpreses deth territòri de cada parc s’i pòden aderir.
Mès informacion:
Es enterpreses e entitats toristiques deth Pirenèu e es Tèrres de Lhèida interessades en aderir-se gratuïtament ath projècte Biosphere pòden meter-se en contacte damb Patronat de Turisme entà recéber mès informacion: info@aralleida.cat.
https://www.biospheresustainable.com/ca/13/lleida
