Grana expectacion pertot deth Pirenèu e es Tèrres de Lhèida deuant d’un des fenomèns mès singulars en astronomia: er eclipsi totau de solei que se debanarà eth 12 d’agost, tàs 20 h 24. Se poderà veir especiaument en sud dera província de Lhèida, en tot concentrar-se enes comarques de Segrià (especiaument en zòna deth Baish Segre) e Garrigues, a on er eclipsi se veirà ath 100 % pendent uns vint-e-cinc segons just abans dera còga de solei.

Segons eth director deth Parc Astronomic deth Montsec (PALM), Salvador Ribas, se tracte d’un des fenomèns mès espectaculars que podem observar en astronomia ena natura, quan eth Solei, era Lua e era Tèrra son alinhadi e era Lua amague eth Solei ath complèt, “un hèt qu’impacte pr’amor que non ei logic ne abituau”, assegure. De hèt, dempús de 1905 que non se podie veir un eclipsi totau de solei en Catalonha e non serà enquiath sègle XXII, que n’i aurà un aute. “Aguest hèt lo convertís en un eveniment unic qu’era nòsta generacion ja non poderà tornar a enguardar, se non ei que se viatge a un aute endret dera planeta”, explique Ribas.

Eth director deth PAM hè a brembar que deth Montsec estant non se poderà veir er eclipsi, alavetz calerà anar tath sud deth Cogant catalan, tath Baish Segre e Garrigues. Totun, eth Parc Astronomic pendent tot er an a divulgat eth fenomèn e es punts a on se poderà enguardar melhor. Diuèrsi municipis dera demarcacion de Lhèida ja son a premanir es endrets mès avienti e era infrastructura corresponenta entà recéber es visitaires. En Lhèida ciutat s’abilitaràn dus espacis, un en Tucòu dera Seu Vella (damb ua capacitat aproximada de 1.500 persones) e un aute en entorn deth camp de fotbòl d’Els Magraners (damb capacitat entà ues 12.000 persones).

Tanben, diuèrsi municipis deth Baish Segre e Garrigues trabalhen entà devier es punts d’observacion de referéncia der eclipsi, damb dispositius especiaus entà acuélher es visitaires e eth rebremabatòri deth besonh de lunetes especiaus omologades entà protegir-se.

Cau hèr a brembar qu’era Generalitat a creat eth portau https://eclipsicatalunya.cat/, qu’actualize diàriament es activitats, es punts d’observacion e es nauetats restacades damb aguest eveniment excepcionau.

Mès informacion:
https://eclipsicatalunya.cat/
https://eclipses.ign.es/