En acte se revindiquèc eth ròtle deth jornalisme entà “explicar e estimar” eth Pirenèu e es Tèrres de Lhèida e se destaquèc era aliança entre eth Patronat e eth Collègi de Jornalistes entà “projectar era demarcacion damb qualitat e rigor”
Eth passat 29 de mai era Diputació de Lleida acuelhec er acte de liurament de guerdons dera 36au edicion deth Prèmi Toristic Internacionau Pica d’Estats de premsa, ràdio, television e mejans digitaus. Eth guerdon ei dotat damb 48.000 euros distribuïdi entre ueit categories (damb 6.000 euros entà cadun des reportatges premiadi) e distinguís es reportatges que promòn mès plan es atrèts toristics deth Pirenèu e es Tèrres de Lhèida.
En cors der acte, eth president dera Deputacion de Lhèida, Joan Talarn, assegurèc que “damb eth 36au Prèmi Pica d’Estats tornam a verificar e a demostrar qu’explicar eth Pirenèu e es Tèrres de Lhèida ei tanben ua manèra d’estimar era nòsta destinacion”. Egaument, rebrembèc qu’aguesta a estat era prumèra edicion organizada entre Patronat de Turisme e eth Collègi de Jornalistes de Catalonha, “ua aliança entà projectar es comarques de Lhèida damb qualitat e rigor”, didec. Destaquèc eth trabalh des jornalistes entà dar votz a qui viu, trabalhe e estime era demarcacion de Lhèida, pr’amor qu’ajude a refortir eth modèl toristic que defen eth Patronat e genère oportunitats pertot deth territòri.
Deth sòn costat, eth vicepresident de Patronat de Turisme, Juan Antonio Serrano, assegurèc qu’eth Pica d’Estats prèmie eth jornalisme de qualitat, eth qu’obsèrve, escote e explique eth territòri damb rigor, sensibilitat e respècte. Segons eth vicepresident, laguens d’un contèxte mercat pera velocitat dera informacion, cau revindicar mès que jamès es contenguts trabalhadi e de qualitat, que permeten transméter era nòsta esséncia e projectar damb credibilitat es atrèts deth territòri. Tanben a arregraït eth prètzhèt des professionaus dera comunicacion, que contribuïssen a generar naues visions e relats entà explicar e méter en valor era destinacion deth Pirenèu e es Tèrres de Lhèida.
Tanben, eth president dera demarcacion de Lhèida deth Collègi de Jornalistes de Catalonha, Francesc de Dios, destaquèc era grana qualitat des 112 trabalhs que se presentèren ath prèmi e arregraïc era simplificacion deth tramit d’inscripcion de trabalhs, qu’a permetut duplicar era chifra de reportatges publicadi en mejans internacionaus qu’an optat ath guerdon (passèc de 12 ena 35au edicion a 24 ena 36au).
Er acte compdèc damb era preséncia des guanhadors d’aguesta 36au edicion deth Prèmi Pica d’Estats, qu’an estat:
1. Melhor reportatge jornalistic: era seria de sèt reportatges 25 anys de Carros de Foc, publicadi pera jornalista Rosa Maria Bosch en La Vanguardia entre eth 3 e eth 9 d’agost de 2025.
2. Melhor article jornalistic: Els pigments secrets del romànic català, d’Àlex Milian, publicat ena revista El Temps en març de 2025.
3. Melhor reportatge fotografic: L’alta Noguera Pallaresa, els 30 quilòmetres de riu més ben conservats de Catalunya, un trabalh d’Òscar Rodbag publicat ena revista Descobrir Catalunya en abriu de 2025.
4. Melhor trabalh de ràdio: La luz que nos da el agua: la central de Camarasa, de Joana Sendra e Luis Jover, emetut er 11 de seteme de 2025 per RNE.
5. Melhor trabalh audiovisuau: Beatus Ille-Àreu, emetut per La 2 eth 16 de noveme de 2024 e qu’a coma èish vertebrador era Mila Verticau d’Àreu.
6. Melhor trabalh transmèdia: Territori Menut – Val d’Aran, Solsona i Cerdanya, ua creacion de Cristina Torra entà Descobrir Catalunya.
7. Melhor trabalh de premsa internacionau: The Pyrenees of Catalonia. Winter in the Realm of Royalty, de Marco Barneveld e Chloe Barneveld, publicat ena revista des Païsi Baishi WideOyster.
8. Melhor trabalh publicat enes mejans de comunicacion locaus: El Pirineu que emociona, un trabalh d’Albert de Gràcia entà MeteoPirineus.
Mès informacion:
