Era Agéncia Catalana de Torisme (ACT) a impulsat era creacion deth Hilat de Rotes deth Vin de Catalonha damb era tòca de potenciar er enotorisme, promòir eth trabalh conjunt entre es agents publics e privats deth sector e consolidar Catalonha coma ua destinacion enotoristica intelligenta, sostenibla e inclusiva, referent en tota Euròpa.

Eth nau Hilat des Rotes deth Vin de Catalonha, damb eth supòrt de Patronat de Turisme de la Diputació de Lleida e des deputacions de Tarragona, Barcelona e Girona, nèish entà refortir era visibilitat e era competitivitat des nau rotes enotoristiques deth país, entre es quaus era Rota deth Vin de Lhèida. Era iniciativa partís dera idèa qu’er enotorisme va ath delà dera visita a chais e includís cultura, païsatge e gastronomia.

Era sua huelha de rota s’articule en quate encastres: trabalh en hilat, estructuracion de producte, promocion conjunta e gestion de donades. Entre es accions previstes destaque era creacion d’un manuau de qualitat entàs membres des rotes e era recèrca de sinergies damb d’auti productes toristics. En encastre promocionau, s’a presentat un nau lògo, un mapa-guida digitau e un vidèo que met en valor er enotorisme coma ua experiéncia transformadora pendent tot er an. Tanben s’amiaràn a tèrme accions enes mercats prioritaris e viatges de familiarizacion damb viatgistes internacionaus.

Fin finau, se desvoloparà ua plataforma compartida de donades, TDS Winetour, impulsada per Eurecat, que permeterà analisar eth comportament deth sector e anticipar tendéncies entà melhorar era prenuda de decisions.
Segons donades recuelhudes pes Rotes deth Vin, Catalonha recep annaument 700.000 visitaires a chais e er impacte dirècte der enotorisme en territòri puge tàs 46 milions d’euros.

Eth Hilat des Rotes deth Vin de Catalonha se presentèc en Madrid eth passat 3 de junh, deuant de 60 agents de viatges e viatgistes, en format workshop e acompanhat d’un jòc de dinamizacion de coneishença des rotes deth vin.

D’un aute costat, eth dia 8 de junh se debanèc era presentacion institucionau en Palai Reiau de Pedralbes, en Barcelona, deuant de jornalistes, d’apròp de 200 representants deth sector e de membres des 9 rotes deth vin de Catalonha.

Mès informacion:

https://rutadelvidelleida.cat/
https://www.catalunya.com/ca/rutes-del-vi-catalunya