Patronat de Turisme de la Diputació de Lleida, damb era collaboracion dera Agéncia Catalana de Torisme (ACT), organizèren eth passat 1 de junh era dusau edicion deth Birding Fòrum Pirenèu e Tèrres de Lhèida. Era jornada, qu’amassèc un centenat de professionaus deth sector de Catalonha en Palai de Congrèssi La Llotja de Lhèida, refermèc era escomesa dera destinacion peth torisme ornitologic e se centrèc ena atraccion deth mercat britanic, era cooperacion, era comunicacion, era comercializacion, era accessibilitat e cambiament climatic. Aguestes dues darrères tematiques, damb eth supòrt de SEO BirdLife Catalonha e der Institut Catalan d’Ornitologia (ICO), respectivament.
Entre es objectius dera amassada cau destacar enfortir eth sector toristic catalan en matèria de torisme ornitologic, plaçar eth Pirenèu e es Tèrres de Lhèida coma ua destinacion privilegiada entara observacion d’audèths e compartir bones practiques. Ath madeish temps s’a volut promòir era cooperacion entre enterpreses, lotjaments e administracions que jòguen era carta d’aguesta aufèrta.
Eth fòrum s’inicièc damb un blòc centrat en mercat britanic, moderat peth director der Airau de Marqueting Conscient dera Agéncia Catalana de Torisme (ACT), Damià Serrano, damb era intervencion de diuèrsi expèrts catalans e anglesi. Pendent eth debat se metec en evidéncia qu’es observadors d’audèths britanics, qu’acostumen a viatjar principaument pendent era tardor e er iuèrn, avaloren experiéncies autentiques que combinen er interès pes espècies damb era descubèrta deth patrimòni naturau deth territòri. Es especialistes coïncidiren en indicar era importància d’aufrir activitats inclusives e adaptades as diferenti perfils de visitaires, completades damb prepauses culturaus e gastronomiques qu’enriquisquen era experiéncia.
Era dusau part dera jornada se centrèc ena comunicacion, era comercializacion e era cooperacion en sector deth torisme ornitologic, damb especialistes de cadun d’aguesti encastres. Es participaires compartiren bones practiques entà impulsar productes e experiéncies de torisme ornitologic de qualitat. Tanben se presentèc eth projècte Birding Èbre Pirenèus, ua iniciativa que promò amassa es Tèrres der Èbre, es secans des Tèrres de Lhèida e eth Pirenèu coma ua grana destinacion entara observacion d’audèths, damb era possibilitat d’aubirar-i enquia 350 espècies diferentes. Ena vrespada, eth programa se barrèc damb dus talhèrs dedicadi ara accessibilitat e ath cambiament climatic.
D’un aute costat Patronat de Turisme de la Diputació de Lleida a convidat eth guida ornitològ Byron Palacios, desvolopador de naui productes deth viatgista britanic Naturetrek, a conéisher eth potenciau des secans de Lhèida coma destinacion de torisme ornitologic. Dempús de participar coma reportaire en Birding Fòrum, Palacios visitèc es espacis de Mas de Melons e eth timonetar d’Alfès, era Resèrva Naturau d’Utxesa damb eth sòn punt d’informacion, e es secans de Balaguer e era zòna de Bellmunt-Almenara e es Plans de Sió. Tanben visitèc lotjaments especializadi ena zòna de Plan d’Urgelh, Urgelh e Noguera, damb es servicis de restauracion, lotjament e hides fotografics vinculadi a Montsonís.
Mès informacion:
https://birdingforum.aralleida.cat/
https://www.naturetrek.co.uk/
